Á næstu vikum verður fyrsti frískápur (frí-ísskápur) í Grafarvogi settur upp. Hann verður á forræði Rótarýklúbbs Grafarvogs sem sér um alla framkvæmd.
Í vetur kom upp umræða í Rótarýklúbbi Grafarvogs um að það
vantaði frískáp í Grafarvoginn og hvort ekki væri upplagt að klúbburinn sæi um
að setja upp slíkan skáp. Frískápar eru þekktir um allan heim en meginmarkmið
með þeim er að minnka matarsóun.
Einstaklingar og fyrirtæki geta sett og sótt mat í skápana og markmiðið
er að sá sem á of mikið af einhverju matarkyns geti sett í skápinn og einhver
annar sem getur notað sér matinn sæki og nýti.
Að sjálfsögðu þarf að merkja matinn vel, með innihaldi og
dagsetningu og mikilvægt er að gengið sé vel frá öllum mat.
Fyrsta skref var að kynnast frískápamenningunni í borginni
og til þess sótti einn félaga um aðgang að admin-síðu frískápahópa. Það var
auðsótt. Innan hópsins er mikil uppsöfnuð þekking og greið leið að upplýsingum.
Því næst var boðið á félagsfund varaborgarfulltrúa sem hefur
reynslu af notkun frískáps. Hann gaf góðar upplýsingar og leiðbeindi um leiðir
innan borgarinnar.
Félagar í klúbbnum höfðu samband við borgarskrifstofur til
að fá leyfi fyrir skápnum og staðsetningu. Óskastaðsetning er Spöngin. Beðið er
eftir leyfi frá borginni og vonast til þess að það komi innan skamms.
Í Spönginni eru tvær matvöruverslanir, bókasafn, nokkrir
matsölustaðir og apótek. Gríðarleg umferð fólks er þarna alla daga og því
hentugt að setja þar niður frískáp.
Rætt var við þá sem reka matvöruverslanir í Spönginni og
óskað eftir samvinnu. Þegar skápurinn er kominn, verður einnig rætt við þá sem
reka veitingahús og fleiri. Skápurinn verður kynntur á fésbókarsíðu og í
hverfisblaði.
Klúbburinn lét teikna skýli fyrir skápinn eða skápana því gert
er ráð fyrir bæði ísskáp og frystiskáp (sjá mynd).
Það er von Rótarýfélaga að skápnum verði vel tekið og að
hann geti þjónað sínum tilgangi sem er fyrst og fremst að minnka matarsóun hjá
fyrirtækjum og einstaklingum.
Vigdís Fjóla Stefánsdóttir, félagi í Rótarýklúbbi Grafarvogs
