Vel heppnað golfmót rótarýfélaga

Golfmót Rótarý var haldið þann 30. júní s.l. á Garðavelli, hjá Golfklúbbnum Leyni á Akranesi. Mótið var hið glæsilegasta, þar sem um 80 golfarar kepptu um glæsileg verðlaun. Þetta er stærsta golfmót Rótarý a.m.k. á síðustu árum og allir skemmtu sér vel. „Eins og oft vill verða, voru aðstæður mism ... Golfmót Rótarý var haldið þann 30. júní s.l. á Garðavelli, hjá Golfklúbbnum Leyni á Akranesi. Mótið var hið glæsilegasta, þar sem um 80 golfarar kepptu um glæsileg verðlaun. Þetta er stærsta golfmót Rótarý a.m.k. á síðustu árum og allir skemmtu sér vel. „Eins og oft vill verða, voru aðstæður mismunandi,“ segir Jón Karl Ólafsson, formaður golfnefndar og segir að það sé staðreynd, að golfiðkun á Íslandi er að mestu spurning um klæðaburð. Mótið var styrktarmót fyrir Rótarýsjóðinn okkar góða og söfnuðust um 330 þúsund krónur, sem munu renna beint í sjóðinn. Að sögn Jóns Karls er þetta er í fyrsta sinn, sem þetta mót er tengt sjóðnum og segir hann að vonandi verði þetta hefð sem muni haldast áfram. „Við erum mjög þakklát fyrir öll framlög í sjóðinn,“ segir Jón Karl. Mótið var þrískipt eins og undanfarin ár. Fyrst ber að nefna, að þetta er keppni á milli rótarýklúbba sem senda keppendur á mótið. Keppt um titil klúbbmeistara ársins og því fylgir mikill og góður montréttur. Glæsilegur farandbikar er í vörslu sigurvegara í heilt ár auk glæsilegra verðlauna. Klúbbar gátu sent eins marga leikmenn og þeir vildu og telja punktar tveggja bestu leikmanna í keppninni. Alls voru 14 klúbbar með einn eða fleiri leikmenn og 12 þeirra töldu í keppni klúbbmeistara. „Við viljum gjarnan hvetja fleiri klúbba til að senda keppendur og lið á næstu árum – þetta er skemmtileg keppni og það er alltaf gaman að hitta svo marga rótarýfélaga og vini,“ segir Jón Karl. Alls voru tæplega 50 rótarýfélagar skráðir í mótið, en aðrir voru gestir og vinir. Mótið var opið öllum, sem skráðu sig. Meðal rótarýkeppenda er líka keppni í höggleik, án forgjafar og er þar einnig krýndur meistari á hverju ári. Veglegur farandbikar er einnig í boði fyrir sigur í þessum flokki og auk þess eru vegleg verðlaun í boði. Allir skráðir leikmenn keppa síðan í punktakeppni einstaklinga og þar eru veitt verðlaun fyrir 3 efsti sætin í karla- og kvennaflokki. Auk þessu voru veitt verðlaun fyrir að vera næst holu eftir upphafshögg á öllum par 3 holum vallarins og fyrir lengsta teighögg karla og kvenna á valinni braut. Verðlaun á mótinu voru glæsileg og það voru margir velunnarar sem studdu mótið með glæsilegum hætti. Sigurvegarar í hverjum flokki fengu 50 þúsund króna framlag í þeirra nafni í Rótarýsjóðinn. Hótel Rangá gaf gistingu og kvöldverð, Stórkaup gaf háþrýstidælu, Lava Show gaf miða á sýningar, Seatrips gaf hvalaskoðun, Þjóðleikhúsið gaf miða á Ormstungu, Borgarleikhúsið gaf miða á sýningar, A4 gaf ferðatösku, JP & B heildverslun gaf vín, Golfklúbbur Reykjavíkur gaf golfhringi, Golfklúbbur Akraness gaf golfhringi, Icelandair gaf golfvörur, Ölgerðin gaf drykkjarvörur, Hreint gaf hreinsivörur, Tjarnarbíó gaf miða á sýningar, Öldur brugghús á Hellu gaf gjafabréf, Taramar gaf snyrtivörur, Mary Cohr gaf snyrtivörur og Rúmföt gaf handklæði. Fleiri lögðu til verðlaun, eins og golfkúlur og aðrar golfvörur, sem fylgdu vinningum, eða voru dregin úr skorkortum, fyrir þau okkar sem voru ekki eins góð í golfi. „Við viljum þakka öllum sem lögðu til vinninga fyrir ómetanlegt framlag,“ bætir Jón Karl við.Rótarýklúbbur Ísafjarðar klúbbmeistari 2026 Eftir harða keppni var það Rótarýklúbbur Ísafjarðar sem stóð upp sem sigurvegari í klúbbakeppni og er hann því klúbbmeistari ársins 2026. Fyrir þeirra hönd kepptu þeir Sævar Þór Ríkharðsson og Gísli Jón Hjaltason. Í öðru sæti varð Rótarýklúbbur Reykjavík-Miðborg og í þriðja sæti varð Rótarýklúbbur Hafnarfjarðar. Í keppni í höggleik án forgjafar var Gísli Þór Sigurbergsson frá Rótarýklúbbi Hafnarfjarðar sigurvegari og lék hann völlinn á 79 höggum við krefjandi aðstæður. Í öðru sæti varð Jón Valur Jónsson frá Rotaract og lék hann á 80 höggum. Í punktakeppni karla varð Sævar Þór Ríkharðsson frá Rótarýklúbbi Ísafjarðar efstur með 35 punkta. Annar varð Gústaf Adolf Björnsson með 34 punkta og í þriðja sæti varð Gísli Hjálmtýsson frá Rótarýklúbbi Austurbæjar með 33 punkta. Í punktakeppni kvenna varð Þórgunnur Stefánsdóttir efst með 40 punkta, sem er frábær árangur við misjafnar aðstæður. Í öðru sæti varð Fjóla Guðrún Friðriksdóttir frá Rótarýklúbbnum Görðum með 34 punkta og í þriðja sæti varð Margrét Hafdís Hauksdóttir einnig með 34 punkta, en hún var aðeins lakari á seinni níu holum vallarins. „Við viljum þakka öllum þeim sem tóku þátt í þessum frábæra degi og einnig viljum við færa starfsfólki golfvallarins þakkir fyrir frábærar móttökur. Við hlökkum til að sjá alla og helst fleiri á næsta ári. Við viljum stefna að því að gera þetta að einum stærsta viðburði Rótarý á hverju ári,“ segir Jón Karl Ólafsson.